Aðeins að hreinsa upp Leif Arnar.

Við Borghildur eyðum mestum tíma í að læra. Þannig er það bara. Inn á milli náum við hins vegar að kreista einhverja skemmtun út úr lífinu. Þannig tók ég t.d. verklega bílprófið um daginn. Til allrar hamingju lenti ég á fimmtugri, einhverfri rússneskri konu með fullkomnunaráráttu. Hún var með tvær stórar vörtur í andlitinu, aðra flennistóra en úr þeirri smærri blómstruðu fjögur löng svört hár. Svo var hún í mjög flegnum bol, en það gerði einhvern veginn illt verra undir þessum kringumstæðum.

Allt að einu: það EINA sem ég einbeitti mér að í ökuprófinu var að STÖÐVA á öllum stöðvunarskyldum og FIKRA mig síðan yfir stöðvunarlínuna til að aðgæta hvort óhætt væri að smella mér yfir. Þegar prófinu lauk sagði rússneska vartan að þetta hefði verið "mediocre" því ég hefði alveg gert í brækurnar á stöðvunarskyldunum. Ég slefaði af undrun. Nánar til tekið skellti rússagrýlan því framan í mig að ég hefði fengið 5 alvarlegar villur fyrir að GLEYMA að "STÖÐVA á stöðvunarskyldum og FIKRA mig síðan yfir". Mér leið eins og í falinni myndavél. Ég var að spá í að bjóða vörtunni í glas og spyrja hvort hún væri gift þegar hún missti út úr sér að ég hefði samt náð prófinu. Ég þakkaði þá bara pent fyrir mig, ákvað að halda tryggð við Borghildi (sem er bara með hárlausar vörtur) og spurði prófdómarann hvenær þessi þáttur af Twilight Zone kæmi á DVD.

Annars eru hér nokkrar myndir, áður óútgefnar.

VL.

Á Hollywood Boulevard rakst Hildur Theodóra á þessa þrjá síkátu vitleysinga. Ég veit ekki hvernig þeim datt öllum í hug að troða sér á þessa mynd. Kannski spilar það inn í að vitleysingarnir rukkuðu okkur allir fyrir myndatökuna - og trúið mér - þá var ekkert bros á andlitinu á þeim. Hvað um það, mér sýnist þetta vera Mjallhvít, Supergirl og Samkynhneigði Sverðabrýnirinn, sem við þekkjum öll svo vel. Ýmsir höfðu gaman af því að stilla sér upp og láta taka mynd af sér við hliðina á þessari stelpu í gallapilsinu. Við nenntum því samt ekki.
Hildur Theodóra átti algjöran stórleik fyrir utan Getty safnið í LA. Hún gekk að þessari frægu styttu og byrjaði að skeina henni í gríð og erg á meðan hún stundi hátt og kallaði "Pabbi, pabbi, sjáðu mig". Ég ætlaði að fara að stöðva hana þegar þessi öryggisvörður (í hvítri skyrtu fyrir miðri mynd) tók af mér ómakið. Honum var ekki skemmt - kannski vegna þess að hann er sá eini sem má skeina styttunni. Ég skammast mín fyrir að segja það, en ég læddist í burtu og faldi mig á meðan. Myndin er tekin 2 mínútum eftir atvikið.
Á Venice Beach hafði þessi ofvaxni hlunkur í lögreglubúningi dottið ofan á vinalegan blökkumann sem var að selja fíkniefni. Það tók um hálftíma að losa fíkniefnasalann undan hlunknum. Vegfarendur skvettu vatni á hlunkinn á meðan til að halda honum á lífi.

Til hvers að leita langt yfir skammt þegar maður er svangur?

Borghildur er búin að eignast margar mjög góðar vinkonur, sem hún hefur hitt á förnum vegi. Þessi kona kom til að lesa af rafmagninu hjá okkur.